Cft Bonaire, Sint Eustatius i Saba (Cft BES) tin su base den e lei di Finansa entidatnan públiko Bonaire, Sint Eustatius i Saba. A base di e lei aki Cft BES ta responsabel pa konsehá gobièrnunan di e entidatnan públiko i e Minister di Asuntunan Interno i Relashonnan di Reino (Minister di BZK), i guia e kolegionan ehekutivo den e maneho diario. Cft Bonaire, Sint Eustatius i Saba ta kai bou di responsabilidat ministerial di e Minister di BZK.
E Kolegio aki ta konsistí di tres miembro: e presidente, un miembro riba proposishon di Bonaire, Sint Eustatius i Saba i un miembro riba proposishon di Hulanda.
Cft Kòrsou i Sint Maarten ta ehersé supervishon manera esaki ta reglá den e lei di konsenso di Reino di supervishon finansiero pa Kòrsou i Sint Maarten. Den e lei aki Cft Kòrsou i Sint Maarten a haña un ròl di señalá i konsehá. Cft Kòrsou i Sint Maarten ta konsistí di kuater miembro: e presidente, un miembro den akuerdo ku sentimentunan di konseho di minister di Kòrsou, un miembro den akuerdo ku sentimentunan di konseho di minister di Sint Maarten i un miembro den akuerdo ku sentimentunan di konseho di Minister di Hulanda.
E Kolegio di supervishon finansiero Aruba ta ehersé supervishon manera esaki ta reglá den e Ordenansa Nashonal di supervishon finansiero temporal di Aruba (LAft). Den e ordenansa aki CAft a haña un ròl di señalá i konsehá.
CAft ta konsistí di tres miembro: e presidente, un miembro den akuerdo ku sentimentunan di konseho di minister di Aruba i un miembro den akuerdo ku sentimentunan di konseho di Minister di Hulanda.
E tres Kolegionan aki ta haña asistensia di un sekretariado komun ku tin ofisina na Kòrsou, Sint Maarten i Aruba. E sekretario i e empleadonan ta den servisio di e Minister di Asuntunan Interno i Relashonnan di Reino.
Stefan de Kok ta e sekretario di tur tres kolegio. E ta haña asistensia di konseheronan di maneho i personal di sosten. Na e momentunan aki tin 18 persona empleá na e sekretariado.