E Kolegio di supervishon finansiero Aruba tin un ròl di señalá i konsehá. E tareanan di e Kolegio ta dirigí riba aprobashon i ehekushon di e presupuestonan ku ta den balansa denter di e límitenan palabrá, i tambe riba dominio di e totalidat di e fiansanan.
Pa por laga e supervishon tuma lugá optimalmente, e Kolegio mester tin bista riba e siklo presupuestario i e maneho finansiero di e pais. E Kolegio ta evaluá si e presupuesto aprobá ta kumpli ku e normanan di e Ordenansa Nashonal di supervishon finansiero di Aruba i ora ta nesesario ta brinda konseho riba esaki. E Kolegio por duna konseho solisitá i no solisitá riba e konsepto di presupuesto. Kontrali na e otro paisnan, pa Aruba ta aplikabel un norma di saldo di finansiamentu, pues e saldo presupuestario kitando e pago di e debe estatal.
Raymond Gradus
Presidente
Raymond Gradus (1962) for di 1 di yüli 2017 ta presidente di e Kolegionan di supervishon finansiero. Gradus a studia Ekonometria General i Empresarial na Katholieke Universiteit Brabant. Na 1990 el a doktorá den siensia ekonómiko. Prof. Gradus tin un eksperiensha gubernamental supstansial riba tereno di maneho ekonómiko i finansiero. Na komienso di su karera (1984-1992) el a traha komo investigadó sientífiko i dosente universitario. Despues (1992-2007) a sigui vários funshon (gerensial) na e Ministerionan di Asuntunan Sosial i Labor, entre otro komo direktor di Asuntunan Finansiero Ekonómiko (FEZ), di Asuntunan Ekonómiko i di Finansa, kua el a sabi di kombiná ku e funshon di dosente universitario prinsipal (partaim) di maneho finansiero ekonómiko (1996-2004). Den e siguiente añanan (2008-2015) e tabata direktor di e Instituto Sientífiko di CDA. For di 2004 e ta profèsòr di gobernashon i ekonomia di e sektor públiko i non-profit na Vrije Universiteit Amsterdam. Tambe e ta afiliá na e grupo profeshonal di accounting i Sentro Zijlstra Center pa Public Control, Leadership i Governance. Ademas e ta miembro di Hunta di Supervishon i presidente di e komité di ouditoria di Haagse Hogeschool (HHS) i miembro di Programmaraad Institute for Public Sector Efficiency. funshonnan adishonal
Hellen van der Wal
Miembro riba proposishon di Aruba
Señora Helena Anke (Hellen) van der Wal (1958) for di 1 di ougùstùs 2018 ta miembro di Kolegio di supervishon finansiero di Aruba, riba proposishon di Aruba. Señora Van der Wal a studia Periodismo i Siensia di Derecho, i den e di dos área aki el a doktorá na 2011 na Vrije Universiteit di Amsterdam. El a kuminsá su karera den mundu di komunikashon komo Hefe di Relashon Públiko i Publisidat na Asosiashon di Diabétiko di Hulanda i Redaktor/Produktor di Material Skibí na Fundashon Teleac. For di 1990 el a traha den vários funshon den aparato gubernamental di Aruba: respektivamente komo Hurista di Legislashon na Departamento di Legislashon, Hefe di Maneho na Departamento di Órden Públiko i Seguridat, Hefe di Staf di Maneho na Kuerpo Polisial di Aruba i Konsehero di Maneho di Ministro di Hustisia. Na aña 1997 el a bai traha pa e Konseho Konsultativo di Aruba, kaminda durante e promé 7 aña e tabata okupá e funshon di Sekretario Interino i despues esun di Sekretario, entre 2004 i 2018. Den e periodo ei el a profundisá su mes mas aleu den Finansa Públiko, entre otro komo Hefe di Investigashon di e Presupuestonan di Pais Aruba i di preparashon di institushon di Kámara Presupuestario di Aruba, miembro di Grupo di Estudio di Finansa Públiko i miembro di e Komishon pa Fortalesé e Sistema Demokrátiko, kual, entre otro, tabatin komo tarea asesoramentu pa órganonan di estado nobo i institushon di e Kámara Presupuestario di Aruba. Riba tereno sosial Señora Van der Wal tabata embolbí pa añanan largu ku Fundashon Telefòn pa Mucha i Hubentut di Aruba, promé komo kofundador i despues komo Presidente i Sekretario. Ademas, di 2007 te 2011 e tabata Representante Karibense den Konseho Asesor Internashonal di Organisashon No Gubernamental pa Follow Up di e Estudio di Sekretario General di Nashonnan Uni di Violensia kontra Mucha. Banda di esei el a lanta na 2006 Fundashon Sosiedat i Kriminalidat, di kua te ainda e ta Presidente. funshonnan adishonal
Henk Kamp
Miembro riba proposishon di Hulanda
Señor H.G.J. (Henk) Kamp (1952) ta miembro di e Kolegionan di supervishon finansiero riba proposishon di Hulanda entrante 1 di ougùstùs 2018. Señor Kamp tin eksperiensha masha amplio tantu na nivel di gobernashon komo na nivel polítiko. For di 1976 pa hopi aña e tabata miembro di Konseho Munisipal i di Kolegio Ehekutivo Munisipal (wethouder) di Borculo na Gelderland, i di 1987 te 1994 e tabata alabes miembro di Parlamento Provinsial di Gelderland. Despues di esei el a kambia bai den polítika nashonal komo miembro di Parlamento Hulandes (Tweede Kamer). Ademas Kamp a okupá susesivamente kuater puesto di minister: di Vivienda Públiko, Planifikashon Urbano i Medio Ambiente, Defensa, Asuntunan Sosial i di Labor i di Asuntunan Ekonómiko. Den e parti Karibense di Reino Henk Kamp ta prinsipalmente konosí pa su ròl komo e promé Komisario pa Hulanda Karibense, kual funshon el a okupá desde 2009. Su tarea tabata di guia e transformashon di Bonaire, Saba i Sint Eustatius pa entidat públiko. Banda di su trabounan na Cft Henk Kamp ta ligá na vários organisashon sosial. Asina, por ehèmpel, e ta presidente di e asosiashon di e sektor di kas di kuido pa ansiano i kuido den bario ActiZ i di tambe di e Konseho di Supervishon di Stichting Ziekenhuis Groep Twente. Ademas e ta miembro di Konseho Konsultativo di Kaak Group na Terborg. funshonnan adishonal