Kolegio di supervishon finansiero Bonaire, Sint Eustatius i Saba ta responsabel pa konsehá gobièrnunan di e entidatnan públiko i e Minister, i pa guia e kolegionan ehekutivo den e maneho diario.
E Kolegio tin un ròl di kontrolá i koregí e atministrashon finansiero di e entidatnan públiko, entre otro e institushon i e manera ku ta yega na e presupuesto i e manera ku ta yega na desishonnan ku konsekuensia finansiero.
E tarea di e Kolegio den e proseso di presupuesto ta di kontrolá i tin bia obligá. E Kolegio ta konsehá tokante e konsepto di presupuesto, i e por duna rekomendashon tambe pa adaptashon di e presupuesto. Mester brinda e Kolegio tambe e oportunidat pa e duna konseho riba adaptashon di e presupuesto. E Kolegio tin un ròl importante serka e maneho finansiero di e entidatnan públiko. E Kolegio semper por hasi un investigashon na e maneho i e struktura di e organisashon finansiero, e por hasi palabrashon ku e kolegionan ehekutivo i si ta nesesario duna instrukshon.
Raymond Gradus
Presidente
Raymond Gradus (1962) for di 1 di yüli 2017 ta presidente di e Kolegionan di supervishon finansiero. Gradus a studia Ekonometria General i Empresarial na Katholieke Universiteit Brabant. Na 1990 el a doktorá den siensia ekonómiko. Prof. Gradus tin un eksperiensha gubernamental supstansial riba tereno di maneho ekonómiko i finansiero. Na komienso di su karera (1984-1992) el a traha komo investigadó sientífiko i dosente universitario. Despues (1992-2007) a sigui vários funshon (gerensial) na e Ministerionan di Asuntunan Sosial i Labor, entre otro komo direktor di Asuntunan Finansiero Ekonómiko (FEZ), di Asuntunan Ekonómiko i di Finansa, kua el a sabi di kombiná ku e funshon di dosente universitario prinsipal (partaim) di maneho finansiero ekonómiko (1996-2004). Den e siguiente añanan (2008-2015) e tabata direktor di e Instituto Sientífiko di CDA. For di 2004 e ta profèsòr di gobernashon i ekonomia di e sektor públiko i non-profit na Vrije Universiteit Amsterdam. Tambe e ta afiliá na e grupo profeshonal di accounting i Sentro Zijlstra Center pa Public Control, Leadership i Governance. Ademas e ta miembro di Hunta di Supervishon i presidente di e komité di ouditoria di Haagse Hogeschool (HHS) i miembro di Programmaraad Institute for Public Sector Efficiency. funshonnan adishonal
Herbert Domacassé
miembro riba proposishon di Bonaire, Sint Eustatius i Saba
Herbert Domacassé (1947) ta miembro di Kolegio di supervishon finansiero riba proposishon di Bonaire, Sint Eustatius en Saba. Domacassé a gradua na nivel di Bachelor i Master den Estudionan Teológiko na Vision University Puerto Rico, ku un ‘major’ den Leadership. Ademas el a finalisá e estudio bankario NIBE kompleto, ku kursonan speshalisá den e mundu bankario i tambe dos aña di estudio di lei na Universidat di Antia Hulandes. Domacassé a kuminsá su karera na Ofisina di Turismo di Bonaire (1968-1969), despues di kua el a hasi e traspaso pa e mundu bankario, den kual e tabata aktivo durante di mas ku trinta aña (1969-2002), ku eksepshon di 1982 pa 1983 ora e tabata ontvanger riba nivel insular i nashonal. Den e periodo ei el a traha pa e bankonan ABN i MCB na Bonaire, Sint Maarten, Kòrsou i Aruba. Despues (2002-2003) a sigui funshonnan gubernamental: promé komo Minister di Tráfiko i Transporte (Telekomunikashon) i despues komo Minister di Enseñansa, Deporte i Kultura pa e anterior Antia Hulandes. Señor Domacassé a terminá su karera gubernamental komo gezaghèber di Bonaire (2003-2008). Aktualmente e ta direktor di su ofisina di konsulta KARA Management & Consultant B.V. Domacassé ta afiliá na diferente instituto di entrenamentu na Bonaire, Aruba i Kòrsou i e ta aktivo den komunidat pa medio di vários organisashon, entre otro Open Heart Ministries pa famianan i Fundashon Krusada, un organisashon ku ta traha riba tereno di kuido di adikshon. Ademas e ta miembro di Hunta di Supervishon di Pensioenfonds Caribisch Nederland. funshonnan adishonal
Henk Kamp
Miembro riba proposishon di Hulanda
Señor H.G.J. (Henk) Kamp (1952) ta miembro di e Kolegionan di supervishon finansiero riba proposishon di Hulanda entrante 1 di yüli 2018. Señor Kamp tin eksperiensha masha amplio tantu na nivel di gobernashon komo na nivel polítiko. For di 1976 pa hopi aña e tabata miembro di Konseho Munisipal i di Kolegio Ehekutivo Munisipal (wethouder) di Borculo na Gelderland, i di 1987 te 1994 e tabata alabes miembro di Parlamento Provinsial di Gelderland. Despues di esei el a kambia bai den polítika nashonal komo miembro di Parlamento Hulandes (Tweede Kamer). Ademas Kamp a okupá susesivamente kuater puesto di minister: di Vivienda Públiko, Planifikashon Urbano i Medio Ambiente, Defensa, Asuntunan Sosial i di Labor i di Asuntunan Ekonómiko. Den e parti Karibense di Reino Henk Kamp ta prinsipalmente konosí pa su ròl komo e promé Komisario pa Hulanda Karibense, kual funshon el a okupá desde 2009. Su tarea tabata di guia e transformashon di Bonaire, Saba i Sint Eustatius pa entidat públiko. Banda di su trabounan na Cft Henk Kamp ta ligá na vários organisashon sosial. Asina, por ehèmpel, e ta presidente di e asosiashon di e sektor di kas di kuido pa ansiano i kuido den bario ActiZ i di tambe di e Konseho di Supervishon di Stichting Ziekenhuis Groep Twente. Ademas e ta miembro di Konseho Konsultativo di Kaak Group na Terborg. funshonnan adishonal